الأربعاء، 29 سبتمبر، 2010

عين العقل



كثيراً ما نعتقد خطأً أن قلوبنا أكثر شعوراً وأحساساً من عقولنا


.... ولكننا مخطئون

.... فالعقل يشعر أكثر من القلب أحياناً

بل في رأيي غالباً

والمواقف والشواهد كثيرة على ذلك

فكم من مرة أتى إلينا صديق أو محب وقدم إلينا كل قرابين الطاعة والولاء ... فأبي عقلك أن يصدقه ... وشعر بكذبه وخداعه ... ودفعك دفعاً للابتعاد .

فرفضت الانصياع لشعور عقلك وسمعت وسوسة قلبك ..أن إبق ... فما أدراك إنه مخادع ؟؟؟؟

ألم تر حلاوة قسماته ؟؟؟

وبراءة نظراته ؟؟؟

ألم تشعر بالصدق في نبرات صوته ؟؟؟

فلتخض التجربة معه


فتنصاع لوسوسته رغماً عنك ...


تاركاً عقلك ناظراً إليك في أسي ... متابعاً الموقف من بعيد


وتجرب ... فتندم ... وتعلم أن عقلك كان على حق فتركض إليه ... لتجلس أمامه جاثياً على ركبتيك ... طالباً الصفح والغفران ..

فيسامح بقلبه الكبير ... وتُفاجئُ بأن لِعقلك قلبٌ أكبر من قلوبنا ..


فكم أخطأنا ثم عدنا نــــــادمين فيسامحنا مربتاً على ظهورنا وماسحاً على رؤوسنا
كأمٍ تحنو على إبنها الشقيّ ذو الطباع السيئة


... لا تكلُ الأم من عطاء الحنان .... ولا يكلُ الإبن من ممارسة طباعه السيئة وأخطاءه الفادحة .



ألم يأن الأوان بعد أن نتبع قلوب عقولنا ؟؟؟؟؟؟

فللعقول قلوب تشعر بما لا تشعر به قلوبنا

ولها عيون ترى ما لا تراه عيوننا

عن نفسي ...

دائما ما أقول لمن أحب :

رأتك عيون عقلي قبل عيوني


(**ولست ممن يفضلون قول عيون قلبي .... لأن عيون القلوب كثيراً ما تخطئ ... وقلما تخطئُ عينُ العقل**) .

الخميس، 19 أغسطس، 2010

أبو الريش + إفطار رمضاني







رمضان كريم عليكم كلكم يارب


طبعاً متأخرة كعادتي دائماً


بس من قبل رمضان بكم يوم وانا بردو كعادتي دائماً عندى برد جامد جداااااااااااااااااا


والظريف بقى ان اصدقائي مش بقوا يقولولي سلامتك لما يشوفوني عندي برد


لا خاااااالص


هما بقو يقولولي سلامتك لما يلاقوني مش عندي برد


----------------------




النهاردة انا جايه علشان اقول ان شاء الله


يوم السبت 28 اغسطس


هايكون في تجمع خيري في مستشفى ابو الريش


وبعدها ان شاء الله هايكون في افطار رمضاني


وكل التفاصيل موجودة عند








واللى ربنا يكرمها على مجهوداتها الدائمة في مجال الخير وتعبها للتحضير لليوم دا


هى و






الراجل الشهم الطيب ابو همس وشابي ربنا يخليهم له يارب اللى في اى خير تلاقيه اول حد بيرتب ويتحمس




دي الايميلات اللى ممكن تبعتو عليها اي استفسار
kouskoza7@hotmail.com
kh_cyc2006@hotmail.com
و دي الأرقام اللي ممكن تبعتوا رسالة عليها او تسالوا على اى شىء خاص باليوم ده
داليا قوس قزح
وده هيكون شغال قبل اللقاء باسبوع فقط
0148693432
خالد همس الاحباب
0101345140




وان شاء الله اليوم يكون ناجح من الجانب الخيري المتمثل في المستشفى او جانب اللقاء التدويني المتمثل في الافطار والتجمع الحلو


ويارب اليوم كدا يكون عسول والجو مش حر ومش رطوبة


واتمنى من الجميع انه يحضر ان شاء الله


وكل رمضان وانتم بالف الف خير ياااااارب


ومتجمعين دايما في عمل الخير




الثلاثاء، 20 يوليو، 2010

قصرٌ وأكواخ

كان طريقها طويلا ً ولكنها كانت ذات بال أطول...
كانت تحمل حلماً جميلا ً في قلبها ويقيناً انها ستجده حتماً
... لم تكل يوماً او تيأس أو تفقد ايمانها بحلمها

سارت في طريقها الطوييييييل بخطوات واثقة ومتأنية باحثة عن ذلك الحلم
لم تعر أى انتباه الى الاصوات اللى تطالبها دوماً بالتوقف
والرضا بكوخ من الأكواخ اللى كانت تصطف على جانبي طريقها

وكلما اقتربت من أحدها فتح لها بابه على مصرعيه وحاول ادخالها بشتى الطرق
وفي كل مرة كانت ترفض

فلم تكن تستهويها الأكواخ الصغيرة المعتمة
وكانت تمقت المساحات الضيقة
آثرت المضي في طريق طويل مقفر ومرهق على أن تدخل كوخاً يجثم ظلامه على عقلها وقلبها

وبعد أن نال منها التعب وأرهقتها المسافات


رأته من بعيد

رأت نوراً مشعاً لامعاً
فسارت اليه كالمسحورة
وصدق حدسها فقد كان ذلك النور هو نور قصرها
الذى طالما حلمت به
قصرها الرحب الواسع

الذى تمنت دوما العيش فيه
والسير في جنباته
لم يفتح لها أبوابه ليجبرها على الدخول بل جعلها تدخله بكامل ارداتها ووعيها

دافعة ً بوابته الكبيرة بكلتا يديها
...


جعلها تشعر بأنه اختياراها
رغم ثقتها بأنه قدرها

....

وفور دخولها اليه

شعرت بأنها كانت على حق


وأن القصور تختلف تمام الاختلاف عن الأكواخ

ايقنت بأنها لن تحتاج أبدا الى الخروج منه يوما حتى لترفه عن نفسها

... فمساحاته الشاسعة

... وشرفاته المضيئة

.... وحدائقه الغنَاء

ستغنيها تماماً عمن سواه

.....

وقفت أرقبها وهى تنظر للأكواخ


ولسان حالها يقول :

وداعاً أيتها الأكواخ
فأنا الآن في أحضان قصري الحبيب

الجمعة، 25 يونيو، 2010

حداداً على خالد

مش عارفه اكتب اى حاجة
حاسه انى حد مقيد مش قادر يعمل حاجة


حتى البوست دا كنت مش هاعمله وبقول
هو انا لما اعمل بوست اقول انه حدادا على خالد الله يرحمه كدا هابئا عملت حاجة بجد؟؟



كدا حقه هايرجع ؟؟




كدا حسرة قلب مامته عليه هاتقل ؟؟؟




كدا هاتنسى مامته صورته اللى في كل مكان وهو مشوه وملامحه متغيرة تماما ؟؟؟




لو عملت البوست دا اللى قتلو خالد هايحسو ويفوقوا ويعترفو مثلا ؟؟؟




.





وبعدين لئيت انى بعد كل دا مش هعرف اعمل اى حاجة بردو غير البوست دا




.
الله يرحمك يا خالد ويسكنك فسيح جناته




حقك عند ربنا مش هايضيع




ربنا يصبر مامتك




وربنا يصبرنى على احساسي بالعجز والجبن ..































الخميس، 3 يونيو، 2010

بوبو ( ام عمر )




في البداية كدا

انا وحشة جدااااااااااا

ومكسوفة اوى اوى من نفسي

لانى مش كنت اعرف ان النهاردة عيد ميلاد بوبو ولسا عارفه حالا
وكان لازم البوست دا اعمله امبارح

كل سنة وانتى طيبة يا بوبو

ويارب دايما فرحانة بعمر وباباه

وربنا يخليكو لبعض



بوبو الانسانة الجميلة

اللى عملت لى احلى مفاجأة لما لقيتها اول حد فعلا افتكر عيد ميلادى

كانت احلى مفاجأة بجد ليا

لانى مش كنت متوقعه انها ممكن تكون فاكرة

وحسيت بجد ان عندى حق لما حسيتها قريبة جدا جدا مع اننا مش اتكلمنا كتير الا مؤخرا يوم البؤجة


موقف بوبو دا واهتمامها بعيد ميلادى فرحنى جدا فوق ما اى حد يتصور

لانى زى ما قلت الحاجات دى بتفرق معايا اوى

وانا النهاردة بقولها انا مبسوطة انى عرفتك اوى

وكل سنة وانتى طيبة يا بوبو

ويارب سنة سعيدة عليكى يا حبيبتى
بحبك جدا جدا



الثلاثاء، 1 يونيو، 2010

سنة سعيدة يا صيدلانية


النهاردة عيد ميلاد صديقة من احلى الصديقات اللى عرفتهم في حياتى

حد عسول وطيوب واللى في قلبها على لسانها

من اول ما اتكلمنا بئينا اصدقاء


ولما شفتها حسيت اننا عارفين بعض من كتييييييييييير اوى اوى

واتكلمنا وكأننا قعدنا مع بعض قبل كدا مئات المرات

كنت زعلانة جدا وهى ماشية وكان نفسي اقعد معاها اكتر

بتضفي على المكان اللى تكون موجودة فيه مرح وبهجة وشقاوة وطيبة


صديقة بجد تسأل في كل وقت وتكون موجودة وقت الفرح والحزن
النهاردة عيد ميلاد حبيبتى




بحبك يا علا اوى اوى اوى

ومبسوطة انك في حياتى وربنا يخليكى يارب ليا


سنة سعيدة عليكى يارب وربنا يجعل كل ايامك عيد ويارب السنة دى تكون اجمل

وتحققي فيها كل اللى تتمنية










الخميس، 27 مايو، 2010

تـــــــــــــــــاج الستــــــــــة 6



منونا حبيبة قلبي دبستنى في تـــــــــــاج


وانا مش اقدر اقول اى حاجة مع منونا ولازم اجاوبه


ومع ان التاج دا مش فيه اسئلة كتير الا انه فعلا صعب جدا


نبتدى التاج


أولا : منين جالى التاج دا ؟


من منـــــــــــــــــــــــونــــــــا طبعااااااااااااااااا




ثانيا : تحدث عن ستة اسرار قد لا يكتشفها من يقابلك لاول مرة




1- انا جبانة جدا جدا يا جماعة بخاف من خيالي زى ما بيقولو وعندى خوف من اى كائن بيتحرك غير البنى ادمين




2- انا ظاهريا هادية اوى اوى ويمكن انا كطبع فعلا هادية لكن من جوايا ممكن اقل حاجة تنرفزنى وتعصبنى لكن العصبية والنرفزة دى بتفضل جوايا ومش بعرف اعبر عنها ودا بيتعبنى احيانا




3- مش بحب الكاّبة ولا النكد خالص خالص بحب الحياة تكون سهلة وجميلة وبحترم جدا الست اللى مش نكدية






4- عنيدة جدا ومش بحب حد يفرض رأيه عليا ولازم اكون مقتنعة بالشئ ولو اقتنعت بحاجة لازم اعملها






5- من جوايا طفلة متعلقة بباباها جدااااااااااااااا .. ولحد دلوقتى بحس انى زى بنت عندها 5 سنين لما بشوفه بفضل قاعدة جنبه وابص له ومش احب اضيع ولا دقيقة من غير ما عينيا تكون شايفاه .... وبحب اللعب جدا وبشترى لنفسي العاب مع بناتى وممكن الامور توصل انى اتخانق معاهم لو واحدة فيهم خدت لعبة انا بحبها وعملت فيها حاجة ههههههههههههههههه


اختى دلوقتى جت جنبي وانا بكتب وقالت لى انتى مش بس طفلة لا وكمان اللى يشوفك اول مره يفكر انك عاقله والحقيقة انك مش كدا اوى


( هى بصراحة وللامانه يعنى قالت ان اللى يشوفك ياريم اول مرة مش يعرف انك مجنونة )








6- بهتم اوى اوى بالتفاصيل يمكن اسيب الشئ الرئيسي واهتم بتفاصيله


ويمكن اصغر التفاصيل تفرحنى .... واصغرها بردو تزعلنى ( عقلي صغير يعنى )


بتأثر فعلا بالتفاصيل بدرجة كبيرة


علشان كدا لما بشوف ناس لاول مره بفضل ساكته واراقب كل التفاصيل وبعدين ابتدى اتعامل




الحمد لله كدا خلصت التاج كدا




طبعا المفروض امرر التاج دا لستة غيري


انا هامرره لاول 6 يكتبو كومنتس عندى


طبعا كدا مش حد خالص هايكتب كومنت عندى هههههههههههههه


لا بجد اول 6 ياخدو التاج


وطبعا لهم مطلق الحرية انهم يجابو عليه او لأ


انا طيوبة وديموقراطية خااااااااالص وسايبه كل حد براحته

الخميس، 20 مايو، 2010

تاج الثأر للكرامة ( الطريق الى عتليت )

اول من لفت نظرى لهذا الموضوع كانت دكتور ستيتة

وكانت فكرتها تمرير الكليبات كتاج

واستجابت ندى الياسمين للفكرة ومررت لى تاج الثأر للكرامة

وانا كمان بنشرهم

مش هاحدد اسماء امرر لها هذا التاج الخاص جدااااااااااااااااااااااا

لكن بجد ياريت كل حد يشوفه ينشره

اهو يا ندى الياسمين بطلت كسل وسمعت كلامك

انا كدا عسولة ؟؟؟؟؟؟؟؟

الجمعة، 23 أبريل، 2010

منونـــــــــــــــــــــــــــــــــا


كان يا ماكان( مش في قديم الزمان لا ..في هذا الزمان ) بنوتة حلوة وعسوله اسمها








منونا تعبت نفسها خالص خالص وعملت لى مفاجأة حلوة زيها


مفاجأة منونا كانت النيو لوك الجديد بتاع المدونة




بجد يامنونا تسلم ايديكى


ميرسي ميرسي ميرسي


مش عارفه اشكرك ازاي على ذوقك وتعبك


ربنا يخليكى ياقمر




منونا يا جماعة مش بس مفاجأتها كانت النيو لوك


المفاجأة انها حسستنى ان في ناس بجد بتفكر في الناس بقلبها مش بس بعقلها


حسستنى ان في ناس لسا بتحب في الله بدون اى هدف او مقابل




ميرســـــــــــــي اوى لانك خليتنى احس الاحساس الحلو دا






الثلاثاء، 6 أبريل، 2010

كل عيد ربيع وانتو طيبين ( بس متأخرة شوية )



الاول وقبل اى حاجة


حمد لله على سلامة احمد مهنى


والحمد لله انه رجع لاهله بالسلامة


ويارب هذه المحنة تمر عليه نفسيا بسلام


.


.


.




وثانيا بئا




كل سنة وانتو طيبيبن وكل عيد ربيع وانتو مبسوطين يارب




انا عارفه انها متأخرة شويه بس عادى يعنى عدوها لى




انا اللى اخرنى عليكم هو دور برد شديد جدا جداااااااااااا


من اسبوعين مش راضي يسيبنى في حالي




بس قلت لازم اعيد عليكم واقول لكم وحشتونى جدا اوى خالص


ويارب بجد تكونوا كلكم قضيتوا عيد ربيع حلو وسعيد

الثلاثاء، 23 مارس، 2010

تلك المرأة

تلك المرأة المدللة منذ نعومة اظافرها ..وحتى بعد زواجها دللها زوجها هى واولادهما


وقضيا معظم سنوات زواجهما خارج البلاد .. لم تشق يوما او تمر بيوم صعب .


كنت اظن دائما انها سوف تنهار اذا قابلتها مشكلة حتى لو كانت صغيرة ..


ولكنى كنت مخطئة فأول مشكلة تقابلها كانت مشكلة تكسر اقوى الرجال..


ولن اقول لكم انها لم تكسرها ..


ولكنها تحملت ولم تنهار وقفت تبحث عن حل


فقد فجعت تلك المرأة باصابة ابنتها بالمرض اللعين وهى لم تتجاوز 28 من عمرها ..


ابنتها الاقرب الى قلبها من وسط ابناءها الخمسة ..


ابنتها تلك الفتاة المملوءة بالمرح وحب الحياة وخفة الروح والدم


.. في ايام قليلة رأت تلك الام ابنتها وهى تذبل وتضعف وينهش المرض جسدها نعم انهارت الام داخليا ولكنها ابدا لم تفقد الامل ..


اقامت في المستشقى ما يقرب من سنتين مع ابنتها وتخلل تلك السنتين ما يقرب من 5 عمليات جراحية


تألمت فيها الام الاّما لا تقل عن اّلام ابنتها ولكنها دوما كانت تردد الحمد لله


وعلّمت ابنتها المريضة ايضا ان لا تجزع ..


علّمتها بدلا من قول الاّه اثناء الألم ان تقول يااااارب ..


وفي يوم من الايام أحست تلك الام بأن ابنتها لم يبق لها في دنيانا الا ساعات قليلة فجلست بجانب ابنتها تقرأ لها القران وتحثها على ترديد اّيات سورة يس ورائها..


بل وحملت ابنتها الى حمام غرفتها في المستشفى وحممتها وغسلت شعرها وصففته بعناية وأبت ان تعاونها احدى الممرضات..


وارجعت فلذة كبدها الى سريرها وعاودت معها قراءة القران ..


ولم يكذب حدس الام و احساسها ..فقد رأت ابتسامة رضا على وجه ابنتها ما ان فرغت من قراءة اّخر اّيات سورة يس وعندما سألت ابنتها عن تلك الابتسامة ..


اجابت الفتاة : ماما انا ماشية ... وشايفة راجل كبير طيب بيضحك لي و بيقولى انتى من الصابرين ... علشان كدا مش عاوزاكي تزعلي يا ماما


انهمرت دموع الام ورددت الشهادتين ومسحت على شعر ابنتها..


وقالت لها : قولى ورايا يا حبيبتى أشهد أن لا اله الا الله وأشهد أن محمدا رسول الله


كررتها الام 3 مرات وكررتها الابنة وراءها واسلمت روحها لله


تلك المرأة العظيمة والام الصابرة هى أمي


ولا اتكلم عنها الان بعين الابنة المحبة لأمها


لا


فأنا هنا اتكلم عنها وأراها بعين الام التى تجزع على ابنتيها اذا وجدت ان حرارتيهما قد ارتفعت حتى ولو نصف درجة


فما بالكم بأم تودع ابنتها الشابة الى مثواها الاخير


لن أقول لكم انها تماسكت بعد وفاة ابنتها ( اختى الحبيبة )


لقد ضعفت قواها وخارت ولم تتوقف دموعها يوما عن السقوط على خديها منذ ذلك اليوم


ولكنها ابدا لم تقل غير كلمة انا لله وانا اليه راجعون


. امى الغالية : نحن كلنا متألمون ولكنى اعلم جيدا انه لا ألم يضاهي اّلامك ..






ملحوظة : دا بوست في مدونتى السابقة أحداثه حية بداخلي منذ عامين

الاثنين، 8 مارس، 2010

جوا في قلبي محبتك




مش عارفه ليه الاغنية دى كل كلماتها بحس انها لبابايا حبيبي اللى واحشنى اوى اوى







وبالذات لما بيقول : جوا في قلبي محبتك







ربنا يخليك ليا يا بابا وربنا يرجعك لنا بالسلامة







بجد انا من غيرك ولا حاجة





كل سنة وانت طيب يا بابا





وعقبال مليون سنة




ملحوظة : انا شلت البوست دا قبل كدا لان الاغنية مش كانت راضية تشتغل

وعلمنى ازاى احط الاغنية صح

ميرسي اوى ليك يا استاذنا يا كبير

الجمعة، 19 فبراير، 2010

سكرة المسكرة وخواطر شابة



الاسبوع دا اسبوع اعياد الميلاد للبنوتات الحلوات

ويارب كتر افراحنا والمدونة خلاص بئت مدونة اعياد الميلاد

ههههههههههههههههههههه

لا بجد في ناس كدا مش ينفع يعدى عيد ميلادهم من غير ما احتفل بيهم


---------

-

-

وامبارح كان عيد ميلاد سكرة المسكرة


سكرة التدوين وسكرتى الحلوة


اللى بموت فيها وفي روحها الحلوة البريئة

ويارب السنة الجاية تكونى في بيت الزوجية ونيجى نقولك كل سنة وانتى طيوبة هناك

كل سنة وانتى طيبة يا سكرة ياقمر وعقبال 200 سنة


------------
لسا عارفه حالا ان النهاردة عيد ميلاد صديقتنا المغربية الللى زى العسل
خواطر شابة
كل سنة وانتى طيبة يا قمر



الثلاثاء، 16 فبراير، 2010

كل سنة وانتى صاحبتى وحبيبتى ( صبرنى يارب )





عيد ميلاد حبيبة قلبي صبرنى يارب


كل سنة وانتى طيبة يا احلى صديقة


صبرنى العسولة اللى مش بيختلف عليها اتنين

ست البيت الشطورة اللى دايما بتتريأ عليا لانى مرات ( مش دايما يعنى ) مش بعرف اطبخ الحاجات الصعبة

ههههههههههههههههههه

الصديقة اللى بجد واللى بتحتوى الناس كلها


القلب الحنون اللى بيسمع مشاكل الناس ويعييييش فيها ويمكن اصحابها ينسو وهى لسا مش نسيت وبتحاول تلاقي لهم حلول


بجد انتى حد جميل اوى


و بجد انتى من الناس اللى فعلا لهم بصمة في حياتى

ربنا يسعدك ياقمر ويبارك لك في زوجك واولادك

وكل سنة وانتى طيبة ياتوتة

ويارب كل سنينك سعادة وحب ورضا ( رضا دى طبعا تحمل المعنيين )


Happy Birthday to you

الثلاثاء، 9 فبراير، 2010

انواع الحب الثمانية




هناك من يحبك بجنون ويسعى جاهداً لإصابتك بهذا الجنون ولا يستوعب رفضك لمشاعره بهذه السهولة فيحاصرك بسيل من المشاعر الغير مرغوبة ويمارس عليك الغيره غير المباحة فيكتفي بحبه لك ويحملك جميل هذا الحب ويجب لزاماً عليك أن تحبه وإلا نعتك بصفات مرفوضة إنسانياً


النوع الثاني
________


هو من تحبه أنت بجنون فيكون مصيبتك العظمى حين يدرك حجم هذا الجنون فيتفنن في إيذائك وكأنه ينتقم منك لأنك أحببته فيتمادى في إيذائك ليذيقك مرارة حبك وافتقاده ويتمادى في الهجر والصد .






النوع الرابع

___________


هو من تحبه أنت وتبادله شعوره فيضمك إلى ممتلكاته بإسم الحب يحاصرك بغيرته فيسجنك بدائرة الممنوعات يحبس عليك أنفاسك يحاسبك على أحلامك ويسلبك حتى أبسط حقوقك وهي التعبير عن شعورك تجاه الآخرين فتعيش في صراع دائم .

النوع الخامس

_____________


هو من يغادر حياتك فيترك ورائه فراغاً باتساع السماء فتحاولجاهدا ملئ الفراغ فتتعرف على من يستحق ومن لا يستحق وتقع في المشاكل .

النوع السادس

__________________



.النوع السابع

____________


هو من يطيل الإنتظار أمام بوابة أحلامك ؛ وإذا سمحت له بالدخول خرب في مدينة أحلامك وشوه أجمل الأشياء بقلبك وتركك نادماً على معرفته


النوع الثامن

___________________



هو من يدخل حياتك بلا إستئذان ، يقدم لك الحب فوق أوراق الورد ، يحملك الي عالم الأحلام ، يحول حياتك إلى عالم الخرافات والأساطير ، يشعرك بمسؤليته تجاهك وأنك مسؤول منه ، يعلمك الصدق والحب والإخلاص ، يحول سوادك إلى بياض ؛ وليلك إلى نهار ؛ وظلمتك إلى شمس ، يصبح قلبك الذي تعشق به ،، وعينك التي ترى بهما ،، هذا الإنسان إذا ضاع بحق نبكي بحرقة


ايميل وصلنى وحبيت تشاركونى بأرائكم في الكلام دا

السبت، 30 يناير، 2010

لقاء اختلف الكل عليه

الاول وقبل اى حاجة عاوزه اقول لسكرة الف الف سلامة عليكى والحمد لله ان شاب فقري طمنا عليكى وعلى سلامتك

ربنا يحميكى ويحرسك يارب


____________________



اما عن اللقاء اللى كان اول لقاء ليا مع المدونين واللى لئيت الكل اختلف عليه وان كانت الاغلبية لم ترض عنه

فانا كانت مشاعري بالنسبة لهذا اللقاء مختلفة تماما

مش هاقول انى كنت مرتاحة اوى يمكن من العدد الكبير وعدم معرفتى طبعا بالجميع

بس انا فعلا راجعة مبسوطة جدا جداااااااااااااااااا لانى شفت ناس كنت هاتجنن واشوفهم

وبجد حسيت ان قلبي بيحكم صح وان اللى برتاح لهم في المدونات هما اللى ارتحت لهم في الحقيقة كمان


فاتيما العسولة الحنونة الرقيقة اللى كانت بتحاول تحسسنى بالالفة وبتحاول رغم الناس الكتير اللى بتكلمها انها كل شويه تقرب منى وتكلمنى

انسانة رائعة بجد


ستوتة حبيبة قلبي العقل وخفة الدم والمرونة في التفكير ومحاولتها الدائمة انها تجمع الناس وتطلع وتنزل مع كل العقول والاعمار

ست بجد بموت فيها


صبرنى يارب صديقتى واختى اللى لما شفتها حسيت انى شفتها وقعدت معاها مليون مرة قبل كدا ولم اشعر ابدا انى اول مره اشوفها

انا عارفه انك يا صبصب عارفه انا بحبك اد ايه وانتى ايه عندى


شيما الشعب لابد له من حكومة تشكمه بنوتة عسولة امورة رقيقة بنت ناس اوى اوى دماغ حلوة


دودو عاشقة الرومانسية دى موضوع تانى بجد اكتر حد حسيته طبيعى وعلى سجيته اوى وطيوبة وبنت جدعة وصديقة بجد بتعرف تقدر معنى الصداقة


سكرة بهجة غير طبيعية واقبال على الحياة اتحسدتى يا سكرة

بسكوتة وهى بسكوتة بجد رقيقة المشاعر عسولة

محاسن صابر كانت من اكتر الناس اللى بتمنى اشوفهم ومع انى مش قعدت معاها خالص بس فرحت اوى بوجودها

منوووش مش قعدت معاها كتير بس مبسوطة انى شفتها بنوتة مؤدبة اوى وهادية اوى

شمس النهار الذوق والاحترام والشياكة كنت اتمنى اتكلم معاها اكتر


الرجال بئا مش اعرف منهم كتير لكن سعدت جدا جدا بتعرفي على

عادل اللى بيحب السينما الذوق اوى اوى مبسوطة اوى ياعادل انى شفتك

هانى باشا خفة الدم مع العقل

سوووو سعيدة اوى انى اتعرفت عليك

الاستاذ خالد همس الاحباب الطيبة والشهامة

باشمهندس سيد مش لحقت اقعد معاه خالص بس كنت هازعل اوى لو مش شفته نور القاهرة كلها

صلاح مسدس صغير الف الف مبروك يا صلاح ربنا يتمم لك على خير وانت عارف انا اد ايه كان نفسي اشوفك واتعرف عليك

محمد عمود نور اللى حسيت انه اخويا الصغير بجد

وليد الدوغري ادب واخلاق وسارة خطيبته كمان زيه ربنا يوفقهم ويتمم لهم على خير


شريف باشا زعلت اوى اوى لانى مش شفتك


كان في ناس موجودين وللاسف مش اتكلمنا خالص

منهم هند و شاب فقري ومحمد غالية و ابو على


دا انطباعى عن اللقاء مش هاكذب واقول انه كان واااااااو وانى مبهورة لانى بردو شفت حاجات مش ريحتنى اوى بس اللى انا رايحة مخصوص علشانهم الحمد لله لم يخيب ظنى فيهم


ودا يكفينى جدا

وبعتذر لو انا خيبت ظن حد فيا





وبردو انا راجعة مبسوووووطة جدا انى شفتكم









الأربعاء، 20 يناير، 2010

الحب في ثانية ابتدائي


بنوتى الكبيرة اللى في برايمري 2 مش بتخبي عنى اى حاجة


متعودة انا وهى اننا نحكى لبعض دايما


من كم يوم رجعت من مدرستها واول ما دخلت قالتلى


مامى انا عاوزة اقولك على موضوع مهم


تعابير وشها كانت جادة للغاية لدرجة انى قلقت


قالتلى : عارفه مريم يا مامى ؟


مريم دى بنوتة معاها في الكلاس


قالتلى :


مريم بتحب عمر اللى معانا في الكلاس


طبعا انا حاولت بطريقة الحقيقة غبية جدا انى احول الموضوع عن نظرها

وقلتلها :

طبعا يا حبيبتى لازم مريم تحب عمر مش هو بردو زى اخوها وكلكم في المدرسة اخوات وبتحبو بعض


بصت لى نظرة مش ريحتنى

نظرة معناها انتى بتستهبلى يا مامى وفاهمنى

وقالت :


يا مامى بتحبه مش زى اخوها

بتحبه يعنى حب بتاع الكبار اللى عاوزين يتجوزو


وكملت كلامها وقالت :


بس مش دى المشكلة

المشكلة ان هو مش بيحبها خالص

وعلشان كدا يامامى مريم راحت تكلم ادم اللى بيحبها وهى بئا مش بتحبه


وتحمست اوى لما وصلت للنقطة دى وهى بتحكى وقالت لى :


يعنى يامامى راحت تكلم ادم ووقفت


معاه علشان تغيظ عمر ولما يشوفها مع ادم يحبها


طبعا انا كنت مذهولة ومزبهلة


وانا اساسا عندى حالة ال نعم .. ومش ناقصة


المهم بنوتى كملت وقالت لى :



انا يامامى مش عجبنى خالص اللى مريم بتعمله واتفقت مع سلمى ( سلمى دى انتيم بنتى ) اننا ننصح مريم


وكملت كلامها :

بصي يا مامى رحنا انا وسلمى لمريم وقلتلها يا مريم اللى بتعمليه دا غلط كدا البنات والولاد هايقولو انك بنت وحشة ومش مؤدبة

ولازم مش تكلمى عمر ولا ادم ولما تروحى الجامعة تحبى علشان الحب دا بتاع الكبار

وبصت لى وقالت لى : مش انا يامامى كلامى كدا صح ؟


قلتلها : صح طبعا يا حبيبتى


قالت لى : طيب يا مامى هو ليه بيقولو ان الحب دا عيب ؟


قلتلها : الحب مش عيب خالص بس لازم اللى يحب يكون كبير وعقله كبير وبيفكر صح والبنت لما تحب تحب واحد عارفه انها هايتجوزها

قالت لى :اه فهمت يا مامى


وفجأة لئيتها بتقول وكأنها افتكرت حاجة مهمة


بس اوعى يامامى تقولى لمامة مريم علشان حرام مامتها هاتضربها وانا وعدتها انى لما احكى لك مش هاتقولى لمامتها اصل هما عارفين ان انا بقولك على كل حاجة


قلتلها : طبعا مش هاقول دا سر بينى وبينك وانتى عارفه اسرارنا مش بتخرج برا ابدا

وانا مبسوطة اوى منك انك بتحكى لمامى كل حاجة



السؤال بئا اللى عاوزة منكم تجاوبونى عليه


هو بجد الاطفال بئو كدا ؟


هما في السن دا بيفكرو يحبو ويتحبو ؟ دول في ثانية ابتدائي يا جماعة يعنى 7 سنين


معقول بنوتة في السن دا تفكر تكلم واحد علشان تغيظ التانى وتخليه يغير


هو احنا مش كنا اطفال ولا ايه


هو انا تصرفي مع بنتى كدا صح ؟


انا بصراحة كلامها قلقنى وخلانى مش عارفه ارد عليها اوى لانى مش توقعت ابدا انهم في السن دا وبيفكرو كدا


حبيت احكى لكم واخد رأيكم واعرف في المواقف اللى زى دى بتتصرفو ازاى علشان ترشدوهم للتصرف السليم




الاثنين، 4 يناير، 2010

عيد ميلاد ست الحلوين


طبعا الكل عارف عيد ميلاد مين

والكل عارف مين ست الحلوين


ايوا برافو عليكم


هى ستيتة حبيبة قلبي


اللى حظي مش حالفنى ولا مرة اشوفها لكن كان حظى حلو جدا لانى عرفتها


دخلت قلبي وحبيتها في الله جدا جدااااااااااا


لدرجة انى يوم ما بسمع صوتها بحس ان يومى كله جميل

الست دى استثنائية بجد

ودا مش شعورى انا لوحدى ناحيتها


دا شعور الكل لانها شامله الكل باهتمامها وحبها وتفهمها لاى حد ولاى سن ولاى شخصية


كل سنة وانتى طيوبة وعسوله يا ستوتة زى ما انتى دايما

وربنا يخليكى لنا

وربنا يفرحك بأولادك ويخليهم لك هما وجوزك ويارب تكونى دايما في سعادة وصحة


happy birthday to you