الجمعة، 22 مايو 2009

جنية الأسنان



وانا صغيرة كنت بشوف مامتي اول ما حد من اخواتي يغير سن لبنية


كانت تاخد صاحب السنة ويقفو في البلكونة في الشمس

وتطلب منه انه يقول يا شمس يا شموسة


خدي سنة الننوسة واديني سنة جديدة اكل بيها البسبوسة

ويرمي السنة للشمس وكله قناعة وثقة ان الشمس هاتقوم بواجبها على اكمل وجه وهاتديه بعد

كم يوم سنة قوية مش هاتسوس من اكل البسبوسة

يمكن كانت بتعمل معايا كدا بس انا مش فاكرة او يمكن حكاية الشمس الشموسة دى مش

كانت طلعت على ايامي

اللى هو من 18 سنة يعني


ومع ان واحدة من صديقات مامتي قالت لماما ان المقولة دي مش صح وانها لازم تقول

خدى سنة الجاموسة مش سنة الننوسة

لكن ماما فضلت تقولها كدا

وانا كمان لم اقتنع بكلام صاحبة ماما لان مش من المنطقي ان السنة اللبنية الصغنونة دى

تتشبه بسنة الجاموسة الا لو اعتبرو ان اللبن هو العامل المشترك بما انه اسمها لبنية وبما ان

الجاموسة بتجيب اللبن
.
.
.

وفضلت كل ما اشوف مامتي بتعمل كدا اقول انا لما اكبر هعمل كدا مع ولادي


وفعلا لما ابتدت بنتى الكبيرة تبدل اسنانها اللبنية

ولما حسيت ان لها سن قرب يتبدل وانه خلاص فاضله شوية ويقع

قلتلها : يا حبيتى هانغنى اغنية ( ننا ) اللى كانت بتغنيها لنا ونرمي سنتنا في الشمس

لكن بنتى بصتلى بامتعاض

وقالتلى : شمس ايه يامامي كدا مش صح خالص لما سنتى تقع هاحطها بالليل تحت المخدة

وجنية الاسنان هاتيجي تاخدها وتحط بدل السنة جنيه ذهب
وتجيب سنة جميلة تانية بعد ايام

مش كتير



واتضح لى ان بنتى عرفت موضوع جنية الاسنان دا من الافلام الاجنبي اللى بتحب تشوفها

وافتكرت اني فعلا شفت معاها مرة فيلم للاطفال كان فيه هذه الجنية المحبوبة للاطفال

ووافقت بنتي على رأيها مع تغيير بسيط

اني طلبت منها انها تسميها حورية الاسنان بدلا من جنية الاسنان

وذلك لجبني الشديد وخوفي من حكاية الجنية دي ومن مجرد ذكر هذا الاسم ...

وتانى تغيير

انى اقنعتها بان حورية الاسنان المصرية بتحط عشرة جنيهات بدلا من الجنية الذهب


ماهى حورية مصرية يعنى غلبانة الله يكون في عونها


ووقعت اول سنة لبنتى وهى في المدرسة بتجري وطبعا ضاعت السنة


والتانية في النادي وتكرر نفس المصير للسنة


وصممت بقا في الثالثة وكنت قد افهمت ابنتى ان معنى ان حورية الاسنان تاخد سنتها من

تحت المخدة يعنى انها هاتكون كبرت خلاص ولازم تكون بنوتة مؤدبة وتريحنى جدااااااا

وتتصرف تصرفات الكبار وتمنع العياط والزن نهائيااااا

ووافقت بنتي

وعشان كدا فرحت جدا بحصولي على السن الثالثة لانها وقعت في البيت المرة دي وخدتها

ووضعتها في علبة صغيرة تحت مخدة بنتي


وقلت اول ما تنام بنتي هاخدها عشان تعتقد ان حورية الاسنان خدتها

لكن بنتى فضلت صاحية طول الليل على امل انها تشوف حورية الاسنان

وانا من كتر التعب نمت ولقيت بنتى الصبح بدري زعلانة وبتقولى الحورية مش خدت

السنة يا مامي

فقلتلها ان الحورية مش بتيجي واحنا صاحيين ومش ينفع حد يشوفها وفعلا نيمت بنتى بعد

عناء وخدت السنة

وتاني يوم واحنا رايحين النادي طلبت من بنتى تلبس لبس اخترته انا وشايفاه مناسب للنادي

لكن هي رفضت

ولما قلتلها :هو احنا مش قلنا مش نتعب مامي واننا خلاص بقينا كبار

قالتلى: صح وعشان بقيت كبيرة المفروض البس اللى انا عاوزاه


وتبعت كلامها بسؤال ونظرة من طرف عينيها


هى ننا ( تقصد مامتى ) بتختارلك لبسك قبل ما تخرجي ؟


حسيت وقتها ان سهر يوم كامل راح على الفاضي

واني مهما عملت بنتي بردو هاتنفذ اللي في دماغها


وانا دلوقتى بعد ما اخلص البوست دا هاقوم ادور على العلبة اللى فيها السنة عشان ارجعها

تحت مخدة بنتى تاني يمكن تحس انها رجعت صغيرة وتسمع كلامي

بس ادعو لي انى اّلاقيها

بعد ما اكتشفت ان المشكلة في اللساااااااااان

مش في الاسنان











الأحد، 17 مايو 2009

كلنا معك يا د / اسلام ( اضراب 17 مايو )



صباح الخير

دلوقتى فجر يوم 17 مايو يوم الاضراب

وان شاء الله يكون ناجح ومثمر

كلنا عرفنا الفكرة من الدكتور اسلام

في مدونة

حنعيش يعنى حنعيش


وان شاء الله نطبقها صح


وصدقوني في اخر اليوم هانحس براحة فظيعة



وياريت مش يكون السلوك دا يوم واحد بس ويكون سلوك دائم .


طبعا شكر خاص لصبرنى يارب اللى تعبت في الحملة الاعلامية جدااااااا


وانا اهو لبيت النداء ونزلت بوست بالبانر يا صبرنى


نتقابل بالليل كلنا ان شاء الله في مدونة الدكتور اسلام


الساعة 12 بالليل .

الجمعة، 8 مايو 2009

التاج .. التاج .. التاج ..التاج ...موعودة يالي عليكي التاج




موني العسولة وصديقي العزيز الاستاذ هاني ( مصري جدا ) مررو لى هذا التاج


ودى اول مرة اجاوب على تاج

يلا استعنت بالله على التاج



من أنت ؟ وما الذى تفعله هنا ؟

انا واحدة جواها كتير وجاية اصدعكم شوية باللى جوايا



إسرائيل تقصف كل جنوب ممكن بحثا عنك ، أى شمال ستقصد؟ .

ولا شمال.. هاقعد في مكانى ومش اسيبه ابدا واللى ربنا كاتبه هايكون

بس انا ممكن اصدر لهم حماتى يمكن ياخدوها بدالي




أنت مكلف بحذف حرف من حروف اللغة العربية .. أيها ستختار ولماذا ؟

دي لغة القران ولا يمكن اجرؤ احذف منها اي حرف



لو قدر لك أن تدخل السجن فما هي القضية التي تتمنى ان تدخل بها إليه؟

لا انا مش اقدر ادخل السجن خالص ...هى حماتى طايقانى وانا كدا لما هاتطيقنى بصحيفة سوابق



بالمناسبة.. منذ متى اكتشفت نفسك؟

ومين قال انى اكتشفت نفسي دى نفسي دى محتاجة كريستوفر كولومبوس عشان يكتشفها



على مفترق طريق لافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟

انا قنوعة كفاية عليا حلمى بس وعلى الاقل عارفه هو ايه



نحن لا نعيش حياتنا بل نتعلم فيها كيف نعيش ما تعليقك؟

لا احنا بنعيش حياتنا وبتعلم واحنا بنعيش يعنى الاتنين سوا



بجملة واحدة فقط أكتب تعريفاً لكل كلمة من الكلمات التالية:

الوطن


المكان اللى احس فيه باحترامى وحقوقي وادميتي واماني

الأم

بحر من العطاء والحنان

الليل

صديقي

الحب

الحب جميل للى عايش فيه


أمريكا

الثعلب المكار

المرأة

الام والاخت والصديقة والزوجة والابنة وعضو الجمعية المتوحشة باختصار هى كل حاجة

الصمت

في صمت سلبي لا أحبذه وفي ايجابي احبه جدا



الانترنت

عالم تانى



أخترمنصباً واتخذ قرارا ؟

مش بحب المناصب

ولا القرارات





قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟

مغيبة ازاى دا هى المحرك الاساسي .. وبعدين دا شعر غزل لازم راجل يتغزل في مرأإة دا حتى عيب ليلى مثلا اللى تتغزل في قيس هو مافيش حياء ولا ايه



أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل

لا اتفق ...

لا ياعم انا مش وش اجرام خالص
افضل ان لا اكون مطلوبا .. دا حتى اريح والله



إلى أين تمضي كلمات الحب .. بعد أن نقولها؟

لو قيلت لمن يستحق اكيد هاتروح لقلبه على طول ويردها باحلى منها قولا وفعلا

اما لو كانت لم لا يستحق فستذهب ادراج الرياح



هل تجد علاقة بشكل أو بآخر بين المرأة وقطاع الطرق ؟

لا طبعا يعنى المرأة الرقيقة العسولة الهادية الدلوعة ممكن تشبه قطاع الطرق الوحشين المجرمين غلاظ القلب دول





هذا فراق بيني وبينك .. متى ولمن تقولها ؟

لو لشخص اقولها لشخص لا يصون العشرة ولا يحترمها


اما لو قلتها لشئ فسأقولها لو ربنا اعاننى لكل معصية او ذنب ممكن ارتكبه



كيف هو غداً ؟

غدا في علم الله سبحانه وتعالى وكله من رب العالمين حلو



امرر التاج الى

صبرنى يارب حبيبتى

القدر وأنا

biberss ( سهران لوحدي 2 )