الجمعة، 31 يوليو، 2009

3 حاجات

السلام عليكم ورحمة الله وبركاته
وحشتونى جدا جدا كلكم
عارفة انى مقصرة اوى معاكم
بس ان شاء الله خلاص هارجع اتابع الكل زى الاول
لا وايه كمان راجعة لكم باسم جديد للمدونة
حبيت اغير الاسم لان حسيت انه مش مناسب خاصة ان مش بكتب في حاجة معينة
وحتى الاسم دا مؤقت لحد ما استقر على اسم اكون مقتنعة بيه
دى اول حاجة كنت عاوزه اقولها
تانى حاجة
عاوزه أبارك لحنين القلب اللى بجد فرحت اوى اوى بخبر حملها
ربنا يتمم لها على خير ويقومها بالسلامة
وتجيب لنا أحلى بيبي
ثالث حاجة
انا فرحانة جدا بيكم
فرحانة انى عرفت ناس بالقلوب الحلوة دي
بجد بنسى اى حاجة لما بلاقي لسا في ناس كدا بتحب في الله ومن غير اى هدف
ناس زى محاسن صابر اللى رغم قصر المدة اللى عرفتها فيها الا انى حاسه انى اعرفها
من سنين طويلة
واللى اسرتنى بذوقها وسؤالها الدائم عنى
وصبرنى يارب الجدعة اوى اللى رغم انشغالها باولادها وبيتها مش بتنسى ابدا تسأل عليا
ميرسي لكل اللى سأل عنى
بجد ميرسي اوى لكم كلكم
ياريت تقولولى رأيكم في الاسم الجديد واستقر عليه ولا لأ

الثلاثاء، 7 يوليو، 2009

انا ونفسي


هناك حالة من الصمت الرهيب سائدة بيني وبين نفسي من فترة ليست بقليلة


( ايوا انا بتكلم بجد لسا مش اتجننت ولا حاجة )


فين ايام زماااااااان لما كنت اقعد مع نفسي نتكلم في كل حاجة


ولو حد فينا زعلان او زهقان التاني يخرجه من حالة الزعل والزهق بسرعة جدا


كنا نقعد انا ونفسي مع بعض نستعيد اى ذكرى حلوة بكل تفاصيلها الدقيقة والصغيرة


او يوم حلو عشناه


او موقف ضحكنا


ونقوم من القعدة دى انا وهي ناسيين اى زعل او ضيق


ونرجع فريش ورايقيين جدا جدااااااااااا


ولا لما يكون في موقف محتاجة اّخد فيه قرار


اول حد ألجأ له هى نفسي


اللى بصراحة يعنى والحق يقال بتدينى القرار الصائب


وانا باخد برأيها وبنفذ كلامها بالظبط


ولكن دوام الحال من المحال


انا ونفسي متخاصمين


اه والله متخاصمين


نكون انا وهي لوحدنا ولا كأننا نعرف بعض


مش بتكلمنى ولا بكلمها


اكون زعلانة ولا تسأل فيا


هى تكون مخنوقة اعمل انا نفسي مش واخده بالي


الظاهر في حد ابن حلال وقع بينا لما شاف قوة علاقتنا


حاولت كتير اصلح العلاقة بينى وبينها بس مش عارفة


وهى كمان انا متأكدة انها حاولت بس بردو مش عرفت



بلييييييييييز حد فيكو يكون عسول كدا ويصالحنا على بعض


ينوبه فينا ثواب




ملحوظة مهمة جدا جدا : انتو كلكو وحشتوني اوى اوى اوى


وانا اسفة لانقطاعي عنكم الفترة الطويلة دي


بس خلاص رجعتلكم ان شاء الله


وحتى مش رايحة أصيف والقروش اللي في البحر دي مش هاتعضنى