حملة مدونتك هانتقذ طفلك

اكيد الكل عارف دلوقتى عن هذه الحملة

وبردو كلنا عارفين ازاى هذا المرض اللعين انتشر بقسوة وللاسف انتشاره كان كبير بين الاطفال

والمرض دا مرهق ماديا ومعنويا جدا جدا

ومن حق المرضى المصابين بهذا المرض علينا اننا نقف معاهم ونساعدهم

انا شخصيا عندى معاناة قريبة مع هذا المرض المدمر مع اختى الله يرحمها

والحمد لله احنا كنا قادرين نعالجها ومع ذلك اراد الله ان ينتصر المرض والحمد لله على كل شئ

فما بالكم بمن لا يستطيع تحمل نفقات هذا العلاج

عموما الموضوع دا مرهق جدا نفسيا عليا ومش عارفه اتكلم فيه

لكن انا هاضع اللينكات اللى فيها كل التفاصيل عن هذه الحملة

وربنا يجازى اصحابها كل خير

دا لينك المدون طهر فؤادك

صاحب مدونة رسول الله 1 ربنا يجازيه كل الخير

http://rasoulallah1.blogspot.com/

دا الموضوع عند حبيبتى صبرنى يارب

http://raghy-emraao-gheer-mathona.blogspot.com/2009/09/blog-post_29.html

ودا عند شموستى شمس النهار

http://shams-elnahar.blogspot.com/2009/09/57357.html

ودا عند الحبيبة ام مالك

http://ommalek2009.blogspot.com/2009/09/blog-post_29.html

وربنا يشفي كل مريض ويبعد شبح هذا المرض عنا وعن كل الناس يارب

انا جييييييت نورت البيت

انا جيت نورت البيت

او مش نورته مش مشكلة








المهم انى رجعت من السفر امبارح








ووحشتونى جدا جدا جدا جدا








ومع انى سافرت لمدة 5 ايام بس ولمكان قريب جدا من مرسى مطروح








يعنى المدة كانت قليلة والمكان مش بعيد بس حسيت انى مفتقداكم اوى








ومفتقدة كتابتكم ومدوناتكم اوى





وان شاء الله هاقرأ كل اللى فاتنى





وميرسي اوى اوى لصبرنى يارب





وللاستاذ هانى باشا

لسؤالهم وقلقهم عليا





وبجد انا سعيدة جدا لانى كسبت اصدقاء حلوين كدا





وربنا يديم المحبة والود بينا دائما

كل سنة وانتم طيبين

كل سنة وانتم طيوبين

كل سنة وانتم عسولين



كل سنة وانتم امورين



عيد سعيد عليكم يا ناس ياحلوين



يارب ايامكم كلها اعياد وسعادة باذن الله

علبة الألوان

السلام عليكم ورحمة الله وبركاته

مش عارفه ليه دايما بحس ان الدنيا علبة الوان كبيييييييييييييييرة اوى

وكل حاجة فيها لها لون معين

حتى الناس وأنا أولهم طبعا

ومش اقصد باللون اللون العادى الطبيعى الظاهر

انا اقصد اللون من جوا

كل لون بدلالاته وما يعبر عنه

انا مثلا كتير اوى بحس اني بينك

مليانة حيوية وبلعب مع بناتى وكأنى طفلة زيهم وفرحانة بالدنيا

ومرات تانية احس انى بلاك غامق جدا

اه والله مرات بحس انى اسود اوي

ودا لما ازعل من حد جدا واّخد منه موقف ودى حاجة مش عارفه ابطلها

لما بزعل اوى او بتصدم في حد مش بعرف اسامح ولا اتعامل معاه خالص

وساعتها بحس انى اسود

واوقات احس اني بني

بحس انى كدا لما اكون رخمة وغلسة ومش ليا مزاج لاي حاجة

بكون كدا ردودى وكلامى من غير اى طعم

مش رايقة ومش صافية زي اللون البني بالظبط

وفي اوقات اخرى احس انى ابيض

( مش هاعرف طبعا اكتب كلمة ابيض باللون الابيض لانها مش هاتكون واضحة

وانتم لانكم عسولين هاتعملو نفسكم انكو شايفينها ابيض

ودا طبعا حفاظا على النظام العام للبوست )

حد هايقول اه انتي مغرورة بئا وهاتقولى ابيض ونقاء وبراءة وكدا

هاقوله لا طبعا خالص

مش اقصد كدا

انا اقصد ابيض يعنى زى ابيض ياورد كدا

ابيض يعنى مش بفكر في اي حاجة خااااااااااااااااااالص

متنحة ومخي متوقف تماما

بلهاء لا افقه شئ

كل ما حد يكلمنى ارد بكلمة ...... نعم ؟؟؟

وفي الوان كتير تانية بحسها فيا

زي الاصفر مثلا لما أغير على شخص او حاجة بحبها

وألوان تانية كتير بس مش فاكراها دلوقتي

انا النهاردة عاوزه كل حد يقرأ البوست دا يكتب لي هو شايف نفسه اي لون

ولو عاوز يقول شايفنى انا لون ايه يقول براحته خالص

بس يكون رأيه بصراحة ..... حتى لو كان رأيه فيا اني بني على طول

ملحوظة :

لانى وجعت دماغكم بقالي فترة بحالتى النفسية الملخبطة

ولانى مش من الناس اللى بتحب تشتكي بس

وزى ما بشارككم حالتي الوحشة لازم اشارككم الحلو كمان

عاوزة اقولكم اني الحمد لله دلوقتى احسن كتيروحاسة اني بينك

ومع اني من امبارح وانا متوترة جدا بسبب تعب شخصية عزيزة عليا اوى

بس حاسه ان شاء الله انها هاتكون احسن

وان تعبها دا مجرد تفكير وارهاق ومش اكتر من كدا باذن الله

لكن اجمالا انا الحمد لله دلوقتى نفسيا تمام وميرسي ليكم جدا ولسعة صدركم معايا

ملحوظة تانية بردو وهامشي بعدها والله على طول :

انا بعتذر عن عدم حضورى يوم السبت للفطار والمستشفى

واللى كنت نفسي اوى احضره لكني لم استطع لظروف خاصة

ومش هاقول اللقاء الجاى هاجى لانى كل ما اقول كدا مش اعرف اّجى وهاسيبها على ربنا

وان شاء الله عندى امل انى اشوفكم قريب