السبت، 6 يونيو 2009

املا قلل .. فضي قلل .. عندي فراغ .. عندي ملل


بالرغم من ان يومي مشحون ومليان تماما زى اي زوجة وام

الا انى حاسه بفراغ وملل فظيييييييييع


حاسه ان كل يوم زى اللى قبله


اقوم الصبح اخد شاور اجهز الغداء

انزل النادى عشان تدريب السباحة بتاع بناتي

(دا اذا كانت بنتي الصغيرة موجودة عندي مش عند مامتي )

وارجع البيت استنى جوزى يرجع وخلاص خلص يومي

مش بقعد فيه ولا دقيقة

ومع ذلك حاسة انى مش بعمل فيه اي حاجة

مش بعمل فيه اى حاجة خاصة بيا أنا

كل يوم بالليل اقول لنفسي

انا فين ؟

هو انا عشان زوجة وأم يبقا خلاص المفروض مش افكر في نفسي ؟


طيب افكر فيها ازاى

اهتم بنفسي ؟ اروح للكوافير ؟ اهتم بمظهري ؟

طيب ما انا بعمل كدا ودايما ... بس مش دا اللى اقصده

عارفة انكو هاتقولو ايه الست الرخمة دي هو احنا ناقصين اكتئاب

بس اعمل ايه يعنى ؟

لو مش فضفضت ليكو انتو هافضفض لمين يعنى ؟

وبعدين انا قدركو

استحملو بقا


اسفة جدا جدااااااااا اني بقالي كم يوم مش بتابع مدوناتكم

بس بجد انا مخنوووووووقة

هناك 35 تعليقًا:

ستيتة يقول...

شوفي الحالة اللي عندك مؤقتة ومش سببها خالص انك عندك فرااااااااااااااااخ

دي حالة كده زي الشعرة
ساعة تروح
وساعة تيجي

وبعدين ها تاخدي وابل متصل من كلام الناس غيري بدلي اعملي سوي
لكن وقتك انت الأقدر فعليا على تحديد اولوياته

وان كان بناتك صغننين وممكن جدا تاخدي اجازة شخصية وتركهم مع مامتك ولو لمدة 6 ساعات تشوفي فيها حد بترتاحي في الكلام معاه

يعني انا مثلا اتنين من صديقاتي القريبات جدا لقلبي مجرد ما نلتقي ونضحك ونفرفش بنرجع بيوتنا بمود تاني خالص
ربنا يذهب عنك قصة القلل دي
ههههههههههههههههههههه

صبرني يارب يقول...

ريييييييم يا حياتي

انتى فين يا بطه تعالي وانا اخدك ونروح ننحرف فى اي مكان ونشرب عصير قصب عادي


عادي انا كتير بتجيلى الحاله دي

باحاول اخرج منها وباخرج وبترجع تاني

حتى خالتى ستيته قايله اهو والله

ساعه تروح وساعه تيجى

عموما يا ريم خلي عندك دايما هوايه او اي حاجه تعمليها تلاقي فيها نفسك وتكوني فيها حاجه تانيه غير زوجه وام


انا عن نفسي لولا النت والكمبيوتر فى حياتي كان زماني فى السرايه الصفرا من زمان

ودايما عزائي ان بفضل الله باقدر اساعد ناس واغير ناس واكلم ناس واصنع فرقا

جو اون اعملي حاجه بتحبيها

اقولك روحي انتى اتدربي على سباحه

وخودينى معاكي
ههههههههههههههههههههههه

MaNoOoSh يقول...

بسيطة قووووووووووي

هقو
شوفى ايه أكتر حاجة قبل الجواز كانت بتبسطك لما تعمليها والجواز نسهالك ورجعي شوية ذكريات واتبسطي بيها.

هى فعلا مجرد حالة ملل ومحتاجة شوية انتعاش بحاجة تحسي فيها بنفسك او بانك انجزتي حاجة.

غير معرف يقول...

لازم تحسي بالحالة دي طبيعي جدا
بئا تودي البنات النادي وينزلوا البسين وأنتي قاعدة تتسلقي في الشمس وتقولي حاسة بملل أنزلي معاهم والمايوة بتاع الاحجبات (التسعميت قطعة) شغال اي نعم هتعملي زي نورماندي تو بس مش مهم
طب بلاش دي
ودي البنات التمرين وروحي الجم ألعبي حديد واهو كلة مصلحة أكيد هنحتاجك في الخناقات أو الجمعية بتاعة المرأة المتوحشة هتستغل عضلات سيادتك في تأديب الازواج اللي لسة عندهم بقايا مقاومة وبيستجروا ويقولوا حاضر طبعا بس بطريقةمش عاجبة الزوجات
ولا أقول لك
تعالي شاركيني في مكتب محاماة ومش هتحسي بالملل خالص
بس مليش دعوة لو نطيتي من الشباك
أو ممكن تروحي لستيتة وتدخلوا المعمل وتحضروا عفاريت أصل ما عندهمش مواد كيماوية علشان التجارب
أو تروحي مع صبرني يا رب تشربوا عصير قصب بس ما تسوقوس علشان ما يتعملش ليكو محضر قصب وقيادة بدون وعي
هااا
راح الملل
والنبي تشوفي لي حد يعالجني
من اية
الملل طبعا

Remas يقول...

ستيتة

هى فعلا حالة بتروح وبتيجي وانا متعودة على كدا

بس المرة دي جت ومش راضية تروووووووووح

مصممة تقعد الظاهر الضيافة عندي عجبتها


والله يا ستيتة عندي بنتى الكبيرة مش ممكن ابدا تسيبني متعلقة بيا جدا جدا

عشان كدا مش بعرف اروح منها اى مكان

انا فعلا لما بقعد مع صديقاتي المقربات بحس اني مرتاحة
بس هما فين

واحدة في امريكا ودي ان شاء الله هتحاول تيجى في شهر 7 ودا يمكن يغير حاجة

والتانية في الامارات ومش هاتنزل مصر السنة دي

ويارب يا ستوتة حكاية القلل والفراخ دى تبعد عننا كلنا

Remas يقول...

صبرني

ازيك يا حياتي


انا بحاول يا صبرني فعلا اعمل اى حاجة بحبها بس مش عارفة في ايه

مش عندى نفس اعمل اى حاجة ولا بقيت بحس بطعم حاجة

عموما نجرب حكاية القصب دي يمكن تنفع

يلا حددي معاد ونروح نشرب قصب عشان ننسى

ياريت اعرف اتدرب سباحة بس مش بعرف اعوم وشكلى هايبقا وحش اوي وانا كبيرة كدا وجبانة وخايفة من المية

بس لو هاتيجى يبقا انا موافقة

يلا حضري المايوه

Remas يقول...

MaNoOoSh

ياقمر وحشانى جدااااااااااا

اه هو فعلا محتاجة احس بنفسي او انى بعمل اى انجاز خاص بيا

قبل الجواز كنت كل حاجة بستمتع بيها بخرج من غير ما اشيل هم حاجة

بناااااااااام براحتى من غير قلق


يلا الحمد لله

المهم انتى بجد وحشانى ياتوتة

Remas يقول...

مصري جدا

شفت ياهاني المعاناة

بكون شايفة البيسين ادامى ومش عارفه اشرب

قصدى مش عارفة انزل

اه انت عاوز تخلص مني بقا بمايوه المحجبات

وابقا نورماندي 3

طيب انا هشاركك في مكتب المحاماة بقا ومش هارمي نفسي من الشباك

وهاشرب عصير قصب مع صبرني ولا هايهمنى اى محاضر

لكن عفاريت في معامل لا عشان بخاف جدا

اوك ياهاني انا هادور على حد يعالجنا احنا الاتنين وانت لو لقيت حد ابقا قولي

مسدس صغير يقول...

ريم
انا عايزك متشيليش للدنيا هم
وفرفشى كده
مع بناتك ربنا يخليهم لك
مع نفسك
مع المدونة
مع صاحبتك فى التليفون
خروجه حلوة انتى والبنات
كده يعنى
ربنا يفك كربك

همس الاحباب يقول...

هههههههه
ده شىء عادى فى الحياة انك تكونى عندك ملل واكتئاب وخنقة كماان
ده الطبيعى
انا كده اطمنيت عليكى وعلى صحتك وعرفت انك بخير وتعانى مما نعانى
من الاخر انتى انسانة طبيعية بمقياس الزمن الاغبر اللى احنا عايشنه
ربنا يسعدك ويوفقك يا ستى
تحياتى

Remas يقول...

مسدص صغير

والله انا لما بشوف الناس اللى زيك انت كل الناس اللى هنا بحس ان فعلا مش شايله هم

وبحس ان زهقي ومللى خف كتير


ربنا يسهل وهى فترة كدا وتعدي

بس انا فعلا كنت محتاجة اتكلم معاكو واقول بصوت عالى لحد انى مخنوقة

ميرسي اوى ليك

Remas يقول...

همس الأحباب


يعنى انت كدا اطمنت ؟

انا كدا طبيعية ؟

طيب يعنى مش ازعل بقا ولا ازهق

خلاص انا كل ما تيجى الحالة دى هافرح واعرف ان لسا عقلي وصحتي بخير


طمنتنى يا ابو همس ربنا يطمنك

نورتنى والله

MǿиY El-Shreef يقول...

ليه بس كده دانتي الي بتهوني عليا الخنقه

والله ياحبي انا رأي من رأي خالتي تاخدي اجازه وتشوفي حد وتخرجوا بس حد يكون قادر انه يغير حالتك المزاجيه :)

يارب دايما تكوني بخير

ووحشاني اوي

Remas يقول...

MǿиY El-Shreef

يا حبيبة قلبي انتى وحشاني اكتر


مش عارفة يا موني الظاهر كدا الخنقة دى عدوى

بس هو على رأي ستيتة هى حالة بتيجى

وتروح كلها شوية وارجع لطبيعتى تانى

ان شاء الله

وانتى ياقمر ربنا يبعد عنك الخنقة

والزهق ويجعل ايامك كلها فرح وسعادة

ebn roshd 777 يقول...

بالرغم من انشغالنا جميعنا باعمالنا وبيوتنا الا ان حالتك هذه منتشره تماما
وتكاد تكون وباء
طنشي وسقعي ونفضي وانسي
كلنا هذا الانسان المكتئب
وادينا عايشين والحمد لله

الشعب لابد له من حكومه تشكمه يقول...

ايييييييييييييييه دنياااااااااا يعنى انا عمالى اقولك انا عندى حاله الـ هه النابعه من حاله الملل وانتى تقوليلى عندك ملل برضه هى مصر كلها عندها المرض ولا ايه؟
بس اييييييييه انا اليومين دول عندى حجات مهمه جدااا بعملها وواخده كل وقتى يعنى بقعد ابص للسقف وبعدين ابص للسقف وبعدين ارجع ابص للسقف اتعب من سقف الصاله ادخل على سقف الاوض لدرجة انى مستعده اقولك عدد الكريستال فى كل نجفه.
وعلى فكره انا سافرت اليكس يوم الجمعه فى محاوله للتغيير وللاسف كانت محاوله فاشله كان يوم مجهد لاقصى الحدود ورجعت مكتأبه اكتر وملانه اكتر
لما تلاقى علاج قوليلى.

Remas يقول...

ebn roshd 777

الاول انت ازيك

واخبارك ايه

وفعلا هى حالة تقريبا عامة او عدوى منتشرة مع انتشار انفلونزا الطيور والخنازير

بحاول اطنش واسقع وانفض واعيش

وربنا يستر

ربنا يبعد عندك الملل والزهق

نورتنى

Remas يقول...

الشعب لا بد له من حكومة تشكمه

ماهو انا جاتلى الاول حالة ال نعم ؟

اللى قلتلك عليها اللى هى شبه حالة ال هه بتاعتك بالظبط

بس الحالة تفاقمت معايا وبدل نعم ؟ تحولت لصمت رهيب

طيب مشاغلك المتمثلة في البص للسقف جابت نتيجة ؟

بقولك ايه احنا احسن حاجة نتقابل انا وانتى يمكن نلاقي حل

انتى وحشاااااانى

حنعيش يعنى حنعيش يقول...

كل واحد فينا عندة هواية كان بيمارسها ويحبها وهوة صغير ارجعى لهوايتك وخصصى لها ساعة كل يوم وجربى تنزلى السوق وتشترى لوازم البيت بس مش من كارفور وما اشبة لا من السوق العادى بتاع زمان ودورى على حد عندة مشكلة وحليهالة... وزورى قرايب من الفرع الغلبان وخدى لهم جاتوة وماتركبيش العربية انزلى اركبى المترو ومشى جنب مدرستك اللبتدائى او الاعدادى وبصى فى وشوش الناس ....صدقينى وصفة مجربة

Remas يقول...

حنعيش يعنى حنعيش

ازيك يا دكتور اسلام

الظاهر انا محتاجة ابص في الكتالوج كويس عشان الحالة دى تروح

تصدق انا عمرى مانزلت سوق عادى في حياتى

ونفسي جدا انزل سوق كدا

هحاول اعمل كدا بجد

وطالما دكتو اسلام قال انها وصفة مجربة يبقا اكيد هاتفيد

منورنى يا دكتور ومجرد وجودك هنا عندى كفيل يخرجنى من الاكتئاب والزهق

عروسة البحر يقول...

انا مقتنعة إنك لازم تدي نفسك الأول عشان تعرفي تدي اللي حواليكي

ده حتى في الطيارة لما بيقولوا إرشادات الأمان في الأول بيقولوا "ساعد نفسك أولاً ثم ساعد من حولك" مش انانية بالعكس كده هتدي اللي حواليكي اكتر و أحسن.

Remas يقول...

عروس البحر

بجد برافو عليكى

انتى قلتى نقطة مهمةجدا جدا

لا يمكن الواحد يدي صح الا اذا كان راضي

نفسه ومديها كل حاجة

نورتينى بجد ياقمر

ومبسوطة جدا بتشريفك مدونتي

شمس النهار يقول...

الحاله دي بتصيبنا كلنا في وقت ما
لما بنلاقي ان كل يوم بيعدي زي اللي قبله واللي بعده
حاله وهتعدي
زيحالات كتير الست بتمر بيها
الفراغ اللي علي اصله لسه قدام لما تلاقي الاولاد كبروا وطول اليوم انت لوحدك في البيت وتحسي ان رسالتك خلصت وماحدش محتاج لخدماتك

ماتقلقيش هتعدي
اعملي اي حاجه انت بتحبيها احي هوايه عندك ونميها
اعملي حاجه جديده تاخد انتباهك

غير معرف يقول...

السلام عليكم ست ريم

كنت اتمنى اجيلك فى ظروف غير ظروفك لمشاركتك فى مدونتك الهادية لكن لاقيت الملل واكل دماغك واستغربت بصراحة انى القى ملل عند الناس من كتر مانا حاسس بيه ومعايشه لكن بعيد عن النصايح الخنقه اللى لاهتودى ولا تجيب ومش هنعمل فيها فلاسفه على دماغ ام عارفه الدنيا ودايساها لكن هما كلمتين يمكن يعملوا حاجة
ملل الانسان سلاح ذو حدين اما يوصلك للتفكير فى التغيير او يوصلك لملل اكتر ونصيحة اخرجى شويه زورى حد من صديقاتك القدام او حتى حد من قرايبك اللى بقالك كتير ناسياهم ولو وقتك مش سامح انصحك انك تقلبى الشقه وتغيرى نظامها ساعات التغيير فى البيت بيحسسك بالافضل كتير بيفرق معايا الموضوع ده لما بغير من شكل الاشياء اللى متعود اشوفها كل يوم ولو مليت واتخنقت من عيشتى مجرد تغيير مكان الكمبيوتر او ترايزة التلفزيون بيحسن ادائى الفكرى
تحياتى واتمنى الاقيكى المره الجايه حالتك افضل وتكونى جيبتى مبيد للملل من صيدلية التغيير
احمد

salma mohamed يقول...

الروتين ده طبيعة حياتنا خاصة في مصر
وفعلا كتيير بنصاب بالملل
لكن لما نتذكر ان المعلق قلبه بالله وشاغل نفسه بذكره فانه يستشعر الانس بالله الذي لا يعادله احساس وليس معه ملل.
http://f0r-allah.blogspot.com/2009/06/blog-post.html

غير معرف يقول...

ريم عاملة ايه
انا رديت عليكى عندى
وجيت اشوف حكاية الملل ديه
فعلا ياريم حاولى تغير من روتين الحياة
زى ماقالت ستيتة ممكن قاعدة مع صديقة
تتكلمى فيها براحتك
اوزيارة فى مكان ما لمدة يوم واحد
حترجعى واخدة طاقة وتدخلى فى مود متغير
بس مش عارفة ايه حكاية الملل مع الصيف
ربنا يسعد ايامك

ahmed_k يقول...

عايزه الحل الأكيد والفوري لحالتك دي
حقولك تعملي أيه
بصي يا ستي أنتي تاخدي بعضك و ......

لالالالالا ده زي سر شويبس

mahasen saber يقول...

اممممممممممممم ازاى يعدينى البوست ده يا قمر

ااقولك يا ريمو تعملى ايه

ممكن تجددى اهتماماتك زى لو بتحبى اللبس جددى فيه لو بتحبى القرايه اائرى فى مواضيع جديده
دبرى سفريه انتى وجوزك والاولاد ولو ليوم واحد

او اخلقى نشاط جديد فى حياتك
روحى اتعلمى حاجه جديده لغه رقصه
روحى اعملى اى نشاط خيرى دار ايتام اطفال معاقين

ااقلك ايه اكتر من كده
انا قلتلك اليى بعرف اعمله لما بتخنق وبمل من الروتين اليومى

mahasen saber يقول...

ااقلك لو رحت اتعلم تانجو عند ساميه علوبه تيجى نروح سوا وهتبقى ليله هههههههههههههه

mahasen saber يقول...

الملل طبيعى احساس بيتخلل اى حياه حتى لو ملوش ارضبه خصبه فى حياتنا
بس اهه احساس ما من احاسيسنا

فتره وهتروح قوام يا ريمو

ربنا يسعدلك كل اوقات حياتك ويهنيكى باولادك وزوجك وكل من تحبين يا جميله

hasona يقول...

السلام عليكم

أهي حالة وهتعدي
كلا نمر بتلك الحالة - رغم ما قد نكون فيه من مشاغل وحكايات

في بعض الاوقات تكون الحلول بسيطة وأمامنا
لكن لا نراها جيداً -لأن كل شئ بيكون في نظرنا مش في مكانه
وليس له قيمة

يمكن تغيير الروتين
يمكن الفضفضة
تغير هذا الحالة

بس الافضل عندما تزول تلك الحالة أن نعمل علي ألا تعود لنا مرة أخري

دمتي بكل خير

تحياتي

حبارير يقول...

شرح الله صدرك وفرج همك


[ولقد نعلم انك يضيق صدرك.......


فسبح بحمد ربك وكن من الساجدين]


صدق الله

عافاك الله يا فندم

غير معرف يقول...

السلام عليكم

بتحكي معكم اخت فلسطينية

مع اني بحبش المصريين الا قلة منهم اللي مش منافقين

بس بدي احكيلك شغلة

انت متعلمة

اذا اه ... فاستغلي مجال تعليمك

واذا لأ ... فـ طامة كبرى



العلم احلى شييييييييء في الدنيا


والله نفسي تعطي مصري طبلة وميهزش

عالم اخر

دمتى بخير



سلام

momken يقول...

دى مشاعر عاديه بتصبنا كلنا نتيجه التكرار فى حياتنا
حتى لو كنا فى منتهى الانشغال

انه الملل انتى بس غيرى جو واكسرى نمط حياتك بحاجه جديده ومجنونه

وكل يوم فكرى تعملى اليوم الى بعده حاجه مجنونه

هتحسى بتحسن وفرح

وكلى مكعين دارك شيكوليت
مفعولها مضمون


تحياتى

momken يقول...

دى مشاعر عاديه بتصبنا كلنا نتيجه التكرار فى حياتنا
حتى لو كنا فى منتهى الانشغال

انه الملل انتى بس غيرى جو واكسرى نمط حياتك بحاجه جديده ومجنونه

وكل يوم فكرى تعملى اليوم الى بعده حاجه مجنونه

هتحسى بتحسن وفرح

وكلى مكعبين دارك شيكوليت
مفعولها مضمون


تحياتى